Pas kritikave të mazhorancës, e sidomos Edi Ramës, për përdorimin e masës së sigurisë “arrest në burg” pa kriter, SPAK ka publikuar një bilanc për vitin 2024.
Në raportin e publikuar mbi hetimet e zhvilluara gjatë vitit 2024, rezulton se janë proceduar 629 persona për çështje të lidhura me korrupsionin dhe krimin e organizuar dhe nga këto vetëm ndaj 236 personave është aplikuar masa e sigurimit personal “Arrest në burg”. Të tjerët, 246 persona janë proceduar në gjendje të lirë dhe ato që mbeten me masa tjera.
Njoftimi i SPAK:
Gjatë vitit 2024, Prokuroria e Posaçme ka kryer hetime ndaj 629 personave.
Prej tyre, vetëm 236 persona ose 37.5% janë hetuar nën masën e sigurimit “arrest me burg”, i parashikuar nga neni 238 i Kodit të Procedurës Penale.
246 persona ose 39.1% janë hetuar në gjendje të lirë.
147 persona ose 23.4 % të hetuar me masa të tjera sigurimi.
Raporti i të paraburgosurve:
Sipas Drejtorisë së Përgjithshme të Burgjeve, numri total i personave në paraburgim është 2791 për vitin 2024.
Nga totali prej 2791, numri i personave në paraburgim të hetuar nga SPAK është 270 persona ose 9.7%.