Njoftimi zyrtar i bërë nga Ministria e Punëve të jashtme të Marokut:
Ministria e Punëve të Jashtme, Bashkëpunimit Afrikan dhe e Marokenëve që Jetojnë Jashtë Vendit
KOMUNIKATË
19.01.2026 – Rabat
Madhëria e Tij Mbreti Mohammed VI, Zoti e ndihmoftë, Kryetar i Komitetit Al-Kods, ka pranuar një ftesë nga Shkëlqesia e Tij z. Donald J. Trump, President i Shteteve të Bashkuara të Amerikës, për t’iu bashkuar, në cilësinë e Anëtarit Themelues, Këshillit të Paqes që Presidenti amerikan synon të lançojë si një nismë që ka për qëllim “të kontribuojë në përpjekjet për paqe në Lindjen e Mesme dhe të miratojë një qasje të re për zgjidhjen e konflikteve në botë”.
Pjesëmarrja në këtë Këshill u është rezervuar një grupi të kufizuar liderësh me staturë ndërkombëtare, të angazhuar në favor të një të ardhmeje të sigurt dhe të begatë për brezat e ardhshëm. Kjo ftesë përbën gjithashtu një njohje të udhëheqjes së ndriçuar të Madhërisë së Tij Mbretit, Zoti e ndihmoftë, dhe të statusit të Tij si një aktor i pazëvendësueshëm i paqes. Ajo dëshmon besimin që gëzon Sovrani pranë Presidentit të Shteteve të Bashkuara dhe komunitetit ndërkombëtar.
Duke përshëndetur angazhimin dhe vizionin e Presidentit Donald Trump për promovimin e paqes, Madhëria e Tij Mbreti, Zoti e ndihmoftë, ka pranuar t’i përgjigjet pozitivisht kësaj ftese. Në këtë kontekst, Mbretëria e Marokut do të ratifikojë Kartën themeluese të këtij Këshilli.
Këshilli i Paqes do të marrë formën juridike të një organizate ndërkombëtare, me ambicien për promovimin e stabilitetit, rivendosjen e qeverisjes dhe garantimin e një paqeje të qëndrueshme në zonat e prekura ose të kërcënuara nga konfliktet. Mandati i kësaj strukture madhore do të bazohet në bashkëpunimin praktik, veprimin efektiv dhe partneritetet e orientuara drejt rezultateve konkrete. Pjesëmarrja në këtë Këshill bëhet ekskluzivisht me ftesë të Presidentit të Shteteve të Bashkuara të Amerikës.
Gjithashtu, Mbretëria e Marokut përshëndet njoftimin për nisjen e fazës së dytë të planit global të paqes të Presidentit Trump, si dhe krijimin zyrtar të Komitetit Kombëtar për Administrimin e Gazës, si një organ i përkohshëm tranzitor.
Maroku, nën udhëheqjen e ndriçuar të Madhërisë së Tij Mbretit, rithekson angazhimin e tij të palëkundur në favor të një paqeje të drejtë, gjithëpërfshirëse dhe të qëndrueshme në Lindjen e Mesme, që mundëson krijimin e një shteti palestinez brenda kufijve të vitit 1967, me Jerusalemin Lindor si kryeqytet, duke jetuar krah për krah dhe në paqe me Izraelin.