Çfarë janë exit polls? Ato janë një grup sondazhesh që i pyesin votuesit për kë kanë votuar, si dhe pyetje shtesë rreth opinioneve të tyre politike, faktorëve që kanë marrë parasysh në zgjedhje dhe, më gjerësisht, për prejardhjen e tyre.
Kjo na ndihmon të kuptojmë më mirë se kush ka dalë për të votuar, si kanë votuar grupe të ndryshme njerëzish dhe si ndihen ata për disa nga çështjet më të mëdha të fushatës.
Rezultatet më të hershme nga exit polls e këtij viti do të raportohen pas orës 5 pasdite ET në Ditën e Zgjedhjeve. Të dhëna që mund të karakterizojnë rezultatin e një gare nuk raportohen deri pasi qendrat e votimit të jenë mbyllur.
Exit polls kryhen nga Edison Research për National Election Pool në emër të një konsorciumi kompanish mediatike: CNN, ABC, CBS dhe NBC. Ata marrin këtë emër sepse intervistuesit, në Ditën e Zgjedhjeve, janë të vendosur jashtë rreth 500 qendrave të votimit në të gjithë vendin, ku kryejnë sondazhe me një përzgjedhje rastësore votuesish që sapo kanë votuar. Qendrat e votimit janë përzgjedhur vetë përmes një mostre rastësore, që do të thotë se intervistat e përfunduara duhet të jenë përfaqësuese të votuesve të Ditës së Zgjedhjeve në shtet ose në shkallë kombëtare. Intervistuesit telefonojnë për të raportuar rezultatet e tyre disa herë gjatë ditës – gjë që do të thotë se shifrat e hershme ka të ngjarë të ndryshojnë ndërsa vijnë më shumë të dhëna.
Por exit poll nuk fillon në Ditën e Zgjedhjeve: Ai synon gjithashtu të përfaqësojë mendimet e miliona amerikanëve që kanë hedhur votën e tyre përpara 5 nëntorit. Intervistuesit janë gjithashtu të vendosur në rreth 100 qendra të votimit të hershëm në disa shtete.
Rezultatet përfshijnë gjithashtu votuesit që kanë votuar herët me postë ose përmes fletëve të votimit në mungesë. Ky grup i elektoratit arrihet përmes sondazheve më tradicionale para zgjedhjeve, të cilat kryhen duke telefonuar, dërguar email ose mesazhe tekstuale tek njerëz të përzgjedhur nga listat e të gjithë votuesve të regjistruar.
Përveç exit poll-it kombëtar, ka gjithashtu sondazhe të ngjashme të kryera në shtete specifike me gara kryesore dhe konkurruese për president apo pozicione të tjera. Këtë vit, këto shtete përfshijnë Arizonën, Xhorxhian, Floridën, Miçiganin, Nevadën, Karolinën e Veriut, Ohajon, Pensilvaninë, Teksasin dhe Uiskonsinin.
Exit polls me prezencë fizike kryhen duke përdorur pyetësorë me letër që plotësohen nga vetë të anketuarit; ata që arrihen me email ose mesazhe tekstuale i përgjigjen pyetjeve online, ndërsa ata që kontaktohen me telefon i përgjigjen pyetjeve të bëra nga një intervistues i drejtpërdrejtë. Çdo exit poll përfshin rreth 20 deri në 25 pyetje dhe është projektuar të zgjasë rreth pesë minuta për t’u plotësuar. Përgjigjet e secilit votues mbeten anonime.
Në fund, exit polls do të përfshijnë intervista me dhjetëra mijëra votues. Kjo përmasa i bën ato një mjet të fuqishëm për të kuptuar profilin demografik dhe pikëpamjet politike të votuesve në zgjedhjet e këtij viti. Dhe gjetjet e tyre eventualisht do të peshohen kundrejt pikës së fundit të referencës: rezultateve të vetë zgjedhjeve.
Megjithatë, exit polls mbeten sondazhe, me marzhe gabimi – që do të thotë se janë më të dobishme kur trajtohen si vlerësime dhe jo si matje të sakta. Kjo është veçanërisht e vërtetë për numrat më të hershëm të exit polls, të cilët ende nuk janë përshtatur për të përputhur rezultatet përfundimtare të zgjedhjeve.